अन्तर्राष्ट्रिय नेपाली टोपी दिवस मनाउन अपील

बिगतका वर्षहरूमा जस्तै यो वर्ष जनवरी १, २०१८ मा पनि नेपाली टोपी लगाएर नेपालीपनका साथअंग्रेजी नयाँ वर्षलाई अन्तर्राष्ट्रिय नेपाली टोपी दिवसका रुपमा बिशेष रुपमा मनाउन अपील गरिएको छ ।

यसले अन्तर्राष्ट्रियरुपमा नेपालीपनको प्रबर्द्धन हुने र देशभित्र पनि आफ्नो संस्कृतिको थप प्रबर्द्धन र प्रसार गर्न मद्दत पुग्ने सरोकारवालाहरूले जनाएका छन् । नेपाली टोपी नेपाली र नेपालीमूलका नागरिक भएका सबै देश र स्थानहरूमा समग्र नेपालीहरूको साझा र मौलिक पहिचानको चिह्न रहेको बताइएको छ । शताब्दीऔं देखि प्रयोग भै रहेका बिभिन्न प्रकारका नेपाली टोपीहरूको प्रयोगलाई अझै व्यापक र बिश्वमय बनाउने उद्देश्यले २०१४ जनवरी १ बाट संस्थापकद्वय डा.लेखनाथ काफ्ले र शंकर बन्जाडे लेअन्तर्राष्ट्रिय नेपाली टोपी दिवसको प्रबर्धन गर्दै आइरहेका छन् ।

अगिल्लो वर्षहरूमा विश्वव्यापीरुपमा भएको व्यापक जनसहभागिता र संचार माध्यमहरूबाट पाएको सहयोग यसपटक पनि प्राप्त हुनेमा संस्थापक द्वय बिश्वस्त छन् । संस्थापक द्वयभन्छन, नेपालमा धेरै प्रकारका टोपी प्रयोग भए पनि भादगाउँले, ढाका र परम्परागत नेपाली टोपी मुख्य हुन् । त्यसबाहेक विभिन्न जात–जातिको आफ्नै टोपी पनि छन् ।

अन्तर्राष्ट्रिय नेपाली टोपी दिवसमा आफ्नो आफ्नो क्षेत्र, जाति–जनजातिले आफ्नै टोपी वा टाउकोमा लगाउने आआफ्नो मौलिक पोशाक लगाएर मनाउन सकिने खुकुलो दिवस हो । १ जनवरीका दिन आ–आफ्नो आफ्नो स्थान र अवस्था अनुसार नेपाली टोपी लगाऔं, फोटो खिचौं अनि नेपाली टोपी दिवसको फेसबुकमा अपलोड गरौँ भन्ने आह्वान पनि गरिएको छ ।

प्रकाशित मिति ९ पुष २०७४, आईतवार १७:५५