मौसमी कामदारको रुपमा कोरिया आएका १७ नेपाली भागे

दक्षिण कोरियाको पोछन नगरपालिकाका लागि नेपालबाट आएका १७ जना मौसमी कामदारहरु कार्य स्थलबाट भागेका छन् । साथै फिलिपिनी १ जना पनि भागेको जनाएको छ । नेपालको पन्चपुरी नगरपालिकामार्फत गत जुन र जुलाईमा तरकारी फार्ममा काम गर्न आएका नेपालीहरु फर्कन करिब १ हप्ता मात्र बाँकी रहेको बेला यसरी भागेको कोरियन संचार माध्यमहरुले जनाएका छन् ।

नेपालको पन्चपुरी नगरपालिका र कोरियाको पोछन नगरपालिका बीच यहाँको कृषि कार्यमा सहयोग गर्ने समझदारी अनुरुप ९० दिनका लागि सि-९ भिसामा ४१ जना नेपाली मौसमी कामदारको रुपमा कोरिया आएका थिए । अहिले तिनीहरु सबै अक्टोबर १४ देखि हराउन थालेको जनाएको छ ।

यसरी मौसमी कामदारको रुपमा आएकाहरुलाई उनीहरुको सहु सहित गत जुलाई १२ मा यहाँको काम, गैरकानुनी बसोबास र स्वदेश फिर्ती तथा मानवाधिकारको बारेमा संयुक्त तालिम समेत दिएका थिए ।

पोछन नगरपालिकाको एक अधिकारीका अनुसार ११ स्थानमा २४ कामदारहरु काम गरिरहेको र नगरपालिकाबाट दिन दिनै फोन गरेर उनीहरुको बारेमा जानकारी लिइरहेको जनाएको छ । उक्त अधिकारीले उनिहरुको फर्कने दिन नजिकिदै गरेको बेला यसरी कामदारहरु हराउँदा यसबाट धेरै समस्याहरू आउन सक्ने चिन्ता गरेका छन् । यसको जानकारी सम्बन्धित निकायमा समेत गरिसकेको जनाएको छ ।

मौसमी कामदारकै लागी भनेर नेपालबाट आएका ५ जना गत अगस्टमा इन्छन एअरपोर्टबाट फर्किनु परेको थियो । उनीहरु कोरिया आइपुग्नु भन्दा अगाडि नै भिसा रद्द भैसकेकोले एअरपोर्टबाटै यसरी फर्किनु परेको हो ।

कोरियामा विशेष गरि कृषि क्षेत्रमा कामदार परिपुर्ति गर्नकालागी २०१५ बाट विभिन्न देशबाट मौसमी कामदारको रुपमा ९० दिनका लागी कामदार ल्याउन सुरु गरेको हो । यसरी आउने कामदारहरु ९० दिन भन्दा बढी बस्न पाउँदैनन् । यहँको कुनै एउटा नगर र अर्को देशको कुनै एउटा नगर बीच सम्झौता गरेर यस्तो कामदार ल्याउने गरिएको छ ।

-Source:fonij Korea

प्रकाशित मिति २१ आश्विन २०७६, मंगलवार १७:३५