राष्ट्रिय पुनर्निर्माण प्राधिकरणमा दुई लाख पाँच हजार गुनासो सुनुवाई

राष्ट्रिय पुनर्निर्माण प्राधिकरणले दुई लाख पाँच हजार ५ सय ८४ गुनासो सुनुवाई भएको जनाएको छ ।

निजी आवास पुनर्निर्माण लाभग्राही सूचीमा नपरेकामा दुई लाख ३७ हजार ८५ जनाले वडामार्फत गुनासो दर्ता गराएको राष्ट्रिय पुनर्निर्माण प्राधिकरणको तथ्याङ्कमा उल्लेख छ ।
गुनासो आउने क्रम अझै जारी छ । प्राधिकरणको टोल फ्री नम्बर र हेलो सरकारबाट पनि उजुरी आउने गरेको प्राधिकरणले जनाएको छ ।

हालसम्म भूकम्प अति प्रभावित १४ जिल्लामा मात्र दुई लाख आठ हजार ४ सय ७८ गुनासो दर्ता भएको प्राधिकरणले जनाएको छ । कम प्रभावित १८ जिल्लामा २८ हजार ६ सय ७ गुनासो दर्ता भए । हालसम्म अति प्रभावित १४ जिल्लाका मात्र गुनासो सम्बोधन भएको छ । भूकम्प प्रभावित ३२ जिल्लाका लाभग्राहीले पुन: निर्माणसम्बन्धी काममा चित्त नबुझेमा गुनासो गर्न सकिने व्यवस्था कार्यविधीमा उल्लेख गरिएको छ ।

प्राधिकरणमा पहिलो चरणमा दर्ता भएका दुई लाख सात हजार उजुरी मध्येबाट ४१ हजार लाभग्राही छनोट भएका थिए । तीमध्ये एक लाख २९ हजार ४ सय ८ उजुरीकर्ताको पुन: सर्वेक्षण गरिएको प्राधिकरणको तथ्याङ्कमा उल्लेख छ । सर्वेक्षणबाट ४२ हजार लाभग्राही थपिएको प्राधिकरणले जनाएको छ ।

प्रकाशित मिति २९ आश्विन २०७५, सोमबार ११:५९