सार्वजनिक शौचालय निर्माण नगरि सोलुखुम्बु खुल्ला दिशा मुक्त जिल्ला घोषणा

सोलुखुम्बुलाई मुलुककै ७६ औ जिल्लाको रुपमा असोज ३ गते घोषणा गरेपनि सार्वजनिक शौचालय नहुदा घोषणाको औचित्य माथी प्रश्न उठेको छ । एक घर एक शौचालयको अवधारणा अनुसार काम भएपनि सार्वजनिक शौचालय नहुदा खुला दिशामुक्त क्षेत्र घोषणाको कार्यान्वयनमा प्रश्न उठेको हो ।

तत्कालिन जिल्ला खानेपानी तथा सरसफाई सब–डिभिजन कार्यालयले तिङलाको बेलिडाडाँमा निर्माण गरेको सार्वजनिक शौचालय बाहेक अन्य कुनैपनि स्थानमा सार्वजनिक शौचालय छैन् । पर्यटकीय क्षेत्र सोलुखुम्बुमा सार्वजनिक शौचालय नहुुनुले आन्तरिक तथा बाह्रय पर्यटकलाई यात्राको क्रममा समस्या हुदै आएको छ । बर्षेनी पचासौ हजार पर्यटक भित्राउने खुम्बुपासाङल्हमू गाउँपालिका क्षेत्रमा पनि सार्वजनिक शौचालय छैन् । पर्यटकलाई भएको सास्ती र सन् २०२० को पर्यटक बर्ष सफल पार्नका लागि गाउँपालिकाले चालु आर्थिक बर्षमा बजेट व्यवस्थापन गरेको छ । लुक्ला देखि दिङबुचेसम्म सार्वजनिक शौचालय निर्माणको लागि एक करोड ५० लाख बजेट विनियोजन गरिएको छ । पर्यटकलाई सहजताका लागि आवश्यक स्थानमा शौचालय निर्माणको काम अघि बढाउने गाउँपालिकाले जनाएको छ ।

सोलुखुम्बुको महाकुलुङ हुदै मेरापिक र पाँचपोखरी जाने पदमार्ग, सोलुदुधकुण्ड नगरपालिकाका पिके, पत्ताले लगायतका पर्यटकीय क्षेत्र र खुम्बुपासाङल्हमू गाउँपालिका कुनैपनि स्थानमा सार्वजनिक शौचालय नहुदा जिल्ला भित्र र बाहिरका जो कोहीलाई पनि शौचका लागि गन्तव्य नै पुग्नुपर्ने बाध्यता रहेको छ ।

सन् २०१७ सालमै जिल्लालाई खुला दिशामुक्त क्षेत्र घोषणा गर्ने लक्ष्य राखिएको भएपनि २०७२ सालको भुकम्पको कारणले पछि धकलिएको थियो । खानेपानी तथा सरसफाई डिभिजन कार्यालय ओखलढुंगाको तथ्यांक अनुसार २३ हजार ७१० घरमा शौचालय भएपनि सार्वजनिक स्थानमा शौचालय नहुदा यात्राको क्रममा शौच गर्नका लागि की गाउँ पस्नुपर्ने की जंगल पस्नुपर्ने अवस्था छ ।

प्रकाशित मिति ११ आश्विन २०७६, शनिबार २०:२४