सोलुखुम्बुको केरुङमा १४ औं बज्रगुरु पूजा, ११ गतेसम्म सञ्चालन हुने

सोलुखुम्बु – नयाँ बर्षको शुभारम्भसँगै सोलुखुम्बुको केरुङमा बज्रगुरु पूजा शुरु भएको छ । केरुङमा भईरहेको यो पूजा १४ औं बज्रगुरु पूजा हो । बज्रगुरुपूजामा तेङ्बोछे गोन्पाका गुरु रिन्पोछे ङवाङ तेन्जिङ जाङ्बु, तोलका टुल्कु सहित अरु ठुला धर्मगुरुहरु पनि सहभागी हुनुहुन्छ ।

पूजामा टाढा टाढाबाट समेत बौद्धधर्मावलम्बी आउनुभएको छ । बज्रगुरु पूजा मूल आयोजक समितिका अध्यक्ष आङ काजी शेर्पाले बज्रगुरु पूजा मानव जातिको लागि मात्रै नभई यो धर्तीमा रहने सम्पूर्ण प्राणी जगतको कल्याण, देशमा शान्ति, सदभाव र अमनचयन कायम रहोस् भन्ने कामनाका लागि बज्रगुरुपूजा आयोजना गरिएको बताउनुभयो ।

उहाँले केरुङको पावन भूमिमा यस अघि यस्तो महान धार्मिक पूजा कहिल्यै नभएको र यो विशाल ऐतिहासिक धार्मिक कार्यक्रम भएको बताउनुभयो । उहाँले आफ्नो महत्वपूर्ण काम त्यागेर पूजामा सरिक हुनुभएकोमा धर्मप्रेमी दाजुभाइ तथा दिदीबहिनीहरुलाई स्वागत गर्दै धन्यबाद व्यक्त गर्नुभयो । अध्यक्ष शेर्पाले बज्रगुरु पूजा सफल पार्नका लागि सबैले आ – आफ्नो क्षेत्रबाट योगदान पुराएको भन्दै सबैलाई धन्यबाद व्यक्त गर्नुभयो । बज्रगुरु पूजा यही बैशाख ११ गते समापन हुनेछ ।

प्रकाशित मिति ४ बैशाख २०७६, बुधबार १६:५७