सोलुखुम्बुमा हिमपात पछि चिसो ह्वातै बढ्यो

सोलुखुम्बु, मंसिर २७, वर्षा भएसँगै हिमाली जिल्ला सोलुखुम्बुमा ह्वात्तै चिसो बढेको छ । हिउँदको समय सुरु भएसंगै सिम सिम बर्षा समेत भए पछि बढी चिसोको महसुस भएको सर्बसाधरणहरुले बताएका छन् । जिल्लाको सदरमुकाम सल्लेरी आसपासको क्षेत्रमा बढी ठण्डी महसुस भएको छ, भने जिल्लाको माथिल्लो क्षेत्र खुम्बुमा हिमपात भएको छ ।
दुई दिनदेखिको बाक्लो कुहिरोले चिसो बढेको खुम्बु क्षेत्रमा आजबाट हिमपात सुरु भएको हो ।

हिमपात सँगै खुम्बु क्षेत्रमा पानी पनि परिरहेको सहकर्मी जेपि राईले जानकारी दिए । चिसो बढेपछि खुम्बु क्षेत्र सहित सल्लेरी तथा आसपासका क्षेत्रका स्थानीयहरुले नियमित काम समेत प्रभावित बनेको छ । मौसम नखुल्नुका साथै चिसो बढे पछि हिउँ पर्न थालेको स्थानीयले बताएका छन् । हिमपातले नाम्चेको माथिल्लो भेग, खुम्जुङ लगायतका माथिल्लो क्षेत्र सेताम्मे बनेको राईको भनाई छ ।

२ दिन देखि हुस्सु र कुहिरो लागेकाले तेन्जिङ हिलारी विमानस्थल लुक्लामा पनि उडान प्रभावित भएकोछ । चिसोका कारण जिल्लाको तल्लो क्षेत्रका सर्बसाधरणको दैनिकिमा समेत फेरबदल भएको छ । अहिले दैनिक बिहानीपख पानी जम्न थालेको छ भने तुसारो पनि पर्न थालेको छ । जाडोले गर्दा स्थानीयहरुलाई बाहिर काममा निश्कन समेत मुस्कील पर्ने गरेको छ ।

खेतबारीको काम छाडेर सर्वसाधारण घरभित्रै बस्न थालेका छन् । चिसोले बढि बृद्धबृद्धा र बालबालीका प्रभावित बनेका छन् । चिसोले बृद्धबृद्धा र बालबालीकामा रुघा, खोकी, निमौनिया जस्ता समस्या देखिने सम्भावना बढेको छ ।

प्रकाशित मिति २७ मंसिर २०७६, शुक्रबार १६:१६