तर, ट्रम्पको नयाँ र ठूलो कर योजना अब नजिकिँदै गर्दा आयोगले आफ्नो अडान कडा बनाएको छ र कुनै पनि “रेडलाईल” नराखी जवाफ दिने चेतावनी दिएको छ। “म स्पष्ट भन्छु: यो टकराव युरोपले सुरु गरेको होइन। हामीलाई यो गलत लाग्छ,” भोन डेर लायनले मंगलबार युरोपेली संसदमा बोल्दै भनिन्।

“हाम्रा जनता र समृद्धिको रक्षा गर्न हामीसँग सबै कुरा छ। हामीसँग विश्वकै सबैभन्दा ठूलो एकल बजार छ। हामीसँग वार्ताको शक्ति छ। हामीसँग प्रतिकार गर्ने सामर्थ्य छ। युरोपका जनताले यो जान्नुपर्छ: हामी सधैं हाम्रा हित र मूल्यहरूको प्रवर्द्धन र रक्षा गर्नेछौं। हामी सधैं युरोपको पक्षमा उभिनेछौं।”

आयोग अध्यक्षले करले दैनिक उपभोक्ताको मूल्यवृद्धि गर्ने, रोजगारी नष्ट गर्ने, सीमामा “नौकरशाही राक्षस” सिर्जना गर्ने र युरोपमा सामान बेच्ने अमेरिकी कम्पनीहरूका लागि “दुःस्वप्न” बन्ने बताइन्। उनले यो कर ट्रम्पको अमेरिकालाई पुनः औद्योगिकीकरण गर्ने एजेन्डाविपरीत हुने पनि अनुमान गरिन्। “यो टकराव कसैको हितमा छैन,” उनले भनिन्।

वार्ताको लक्ष्य, तर प्रतिकारको तयारी

उर्सुलाले आफ्नो सम्बोधनभरि आयोगको लक्ष्य “वार्ताबाट समाधान” निकाल्नु रहेको बताइन्। यो कदमले अटलान्टिकको दुवै किनारबीच पूर्ण व्यापार युद्ध निम्त्याउन सक्छ, जसले विश्वव्यापी अनिश्चितताको समयमा विनाशकारी आर्थिक परिणाम ल्याउने विश्लेषकहरूको अनुमान छ। “हामी यी वार्ताहरूलाई शक्तिको स्थितिबाट अघि बढाउनेछौं। युरोपसँग धेरै हतियार छन्: व्यापारदेखि प्रविधि र हाम्रो बजारको आकारसम्म,” उनले भनिन्। तर, उनले चेतावनी दिँदै थपिन्, यदि वार्ताले सम्झौता ननिकाले ब्रसेल्सले “कडा प्रतिकारात्मक कदम” चाल्न हिचकिचाउने छैन र सबै विकल्प खुला राखिएको छ।

“हामी सबैका लागि रचनात्मक समाधान निकाल्न सके राम्रो हुन्छ,” उर्सुलाले स्ट्रासबर्गका सांसदहरूलाई भनिन्। “तर यो पनि स्पष्ट हुनुपर्छ: यो टकराव युरोपले सुरु गरेको होइन। हामी प्रतिकार गर्न चाहँदैनौं, तर आवश्यक परे हामीसँग बलियो योजना छ।” व्यापार तनाव बढ्दै जाँदा भोन डेर लायनले ह्वाइट हाउसविरुद्ध एकीकृत मोर्चा सुनिश्चित गर्न ईयूका नेताहरूसँग संलग्नता तीव्र बनाएकी छन्। राज्य र सरकार प्रमुखहरू ट्रम्पको करलाई जवाफविहीन छोड्न नहुनेमा सहमत छन्, तर प्रतिकारमा कुन उत्पादनलाई लक्षित गर्ने भन्नेमा मतभेद छ। उनीहरू चिन्तित छन् कि प्रतिकारले उनीहरूको घरेलु अर्थतन्त्रका प्रमुख उद्योगहरूलाई हानि पुर्‍याउन सक्छ।

नेपालको सन्दर्भमा यो व्यापार युद्धको प्रभाव अप्रत्यक्ष रूपमा देखिन सक्छ। युरोप र अमेरिकाबीचको तनावले विश्व बजारमा मूल्यवृद्धि र आपूर्ति शृंखलामा अवरोध ल्याउन सक्ने विज्ञहरू बताउँछन्। नेपालजस्ता विकासशील मुलुकहरूले यस्ता आर्थिक झट्काबाट बच्न सतर्कता अपनाउनुपर्ने देखिन्छ।

– यूरोपियन एजेन्सीको सहयोगमा