पेम्बा गेलु शेर्पा/ मे १, २०२५ — सोमबार स्पेन र पोर्चुगलमा भएको आकस्मिक विद्युत् अवरोधका कारण हजारौं यात्रुहरूको यात्रा योजना अवरुद्ध भएको छ। ५०० भन्दा बढी उडानहरू रद्द भएका छन् भने सयौं उडान ढिलाइ भएका छन्। के तपाईं पनि प्रभावित यात्रुहरूमध्ये एक हुनुहुन्छ ? यदि हुनुहुन्छ भने, तपाईंको अधिकारबारे जानकारी लिनु अहिले अत्यावश्यक छ।

विद्युत् अवरोधले धेरै यात्रुहरूलाई विमानस्थलमा अलपत्र पार्‍यो। कतिपयले विमानस्थलको भुइँमै रात बिताउनुपर्‍यो। यस्तो असाधारण अवस्थाले तपाईंको यात्रा मात्र होइन, आर्थिक पक्षमा समेत असर पुर्याउन सक्छ। यस्तोमा तपाईंले के गर्न सक्नुहुन्छ, र के–के हक पाउनुहुन्छ भन्नेबारेमा विज्ञहरूले जानकारी दिएका छन्।

तपाईंको उडान रद्द भएको छ भने के गर्न सकिन्छ?

युके तथा युरोपियन युनियनको यात्रु अधिकारसम्बन्धी कानुनअनुसार, यदि तपाईंको उडान एयरलाइन्सको गल्ती वा नियन्त्रणभित्रको कारणले रद्द भएको हो भने, तपाईंले क्षतिपूर्तिको दाबी गर्न सक्नुहुन्छ। तर, यो ब्ल्याकआउटजस्तो अप्रत्याशित र बाह्य कारणले भएको घटना एयरलाइन्सको नियन्त्रणबाहिर पर्छ।

गिगास्योर ट्राभल इन्स्योरेन्सका सीईओ अर्नेस्टो सुआरेजका अनुसार, “विद्युत् अवरोधजस्तो अवस्थामा एयरलाइन्सले नगद क्षतिपूर्ति दिन बाध्य हुँदैन। तर, यात्रुहरूले होटल, खाना र वैकल्पिक यात्रा खर्चजस्ता हेरचाह पाउने अधिकार भने पाउनुहुन्छ।”

यदि तपाईंको उडान दुई घण्टाभन्दा बढी ढिलाइ भएको छ भने, तपाईंले एयरलाइन्सबाट खाना वा नास्ताको व्यवस्था पाउने अधिकार राख्नुहुन्छ। ढिलाइ रातभर लम्बिएमा, तपाईंलाई होटलमा बस्ने व्यवस्था गरिनु पर्छ। तर व्यवहारमा एयरलाइन्सहरूले तपाईंलाई आफैँ होटल बुक गर्न सुझाव दिने र पछि रसिदको आधारमा पैसा फिर्ता दिने प्रक्रिया अपनाउँछन्।

यदि तपाईंले ट्राभल इन्स्योरेन्स लिएको हुनुहुन्छ भने र त्यसमा “विस्तारित यात्रा अवरोध कभर” समावेश गरिएको छ भने, तपाईंले ढिलाइ, छोट्याइएको यात्रा, होटल परिवर्तन वा बसाइ लम्ब्याउनुपरेमा भएको खर्चको क्षतिपूर्ति पाउन सक्नुहुन्छ। सुआरेजका अनुसार, “यदि तपाईं विद्युत् अवरोधका कारण फिर्ता आउन सक्नुहुन्न भने, तपाईं फर्कन सक्ने समयसम्म इन्स्योरेन्सले थप खर्चको कभरेज दिन सक्छ – तर यो तपाईंको पोलिसीका सर्तहरूमा निर्भर गर्दछ।”

क्षतिपूर्तिका लागि प्रमाण के राख्ने?

सागा ट्राभल इन्स्योरेन्सकी यात्रा विशेषज्ञ मिशेल कूपरले यात्रुहरूलाई सबै खर्चको प्रमाण सुरक्षित राख्न सुझाव दिनुभएको छ। “तपाईंले होटल, खाना, यातायातजस्ता सबै रसिदहरू, र एयरलाइन्स वा टुर अपरेटरबाट प्राप्त सूचना (ईमेल, टेक्स्ट, स्क्रिनसट) राख्नुपर्छ,” कूपरले बताउनुभयो। “संभाव्य अवरोधका बेला मोबाइलमा कागजातहरूको फोटो खिच्नु, अफलाइन प्रतिलिपि सुरक्षित गर्नु पनि बुद्धिमानी हुन्छ।”

तपाईंको होटल असुरक्षित भयो भने के गर्न सकिन्छ?

कतिपय यात्रुहरू विद्युत् अवरोधका कारण होटलमा प्रवेश गर्न सकेनन्, ढोका लकहरू नखुल्ने, बत्ती नबल्ने, वा फायर अलार्म नचलेकोजस्ता कारणले। यदि तपाईंले होटल छाड्नुपरेको थियो भने, तपाईंले त्यसको स्पष्ट कारण देखाउने प्रमाण (फोटो, होटलबाट प्राप्त पुष्टि, आदि) र नयाँ होटलको रसिद सुरक्षित राख्नुपर्छ। यी प्रमाणका आधारमा तपाईंले ट्राभल इन्स्योरेन्समार्फत क्षतिपूर्ति माग गर्न सक्नुहुन्छ।

यदि तपाईंले यात्रा नगर्ने निर्णय गर्नुभयो भने के तपाईं पैसा फिर्ता पाउनुहुन्छ?

यदि तपाईंले स्वेच्छाले यात्रा नगर्ने निर्णय गर्नुभयो भने, तपाईं सिधै क्षतिपूर्तिका लागि योग्य नहुन सक्नुहुन्छ।
तर, यदि एयरलाइन्स वा सम्बन्धित सरकारी निकायले गन्तव्यमा यात्रा नगर्न सुझाव दिएको हो भने, तपाईंले दाबी गर्न सक्नुहुन्छ।
कूपरले यात्रुहरूलाई यात्रा प्रदायक वा टुर अपरेटरको एप, वेबसाइट वा सामाजिक सञ्जालमार्फत वास्तविक समयको जानकारी लिन आग्रह गर्नुभएको छ।

यदि तपाईंले गन्तव्य वा यात्रा मिति परिवर्तन गर्नुभयो भने, तपाईंको ट्राभल इन्स्योरेन्स अझै लागु हुन्छ कि हुँदैन भनेर जाँच गर्नु जरुरी हुन्छ। कहिलेकाहीँ नयाँ गन्तव्य वा मितिका लागि नयाँ पोलिसी आवश्यक पर्न सक्छ।

विद्युत् अवरोधजस्ता अनियन्त्रित अवस्थाले तपाईंको यात्रा योजनामा अवरोध ल्याउन सक्छ। यस्ता अवस्थामा, तपाईंले आफ्नो अधिकार बुझ्नुपर्छ, खर्चको प्रमाण सुरक्षित राख्नुपर्छ र आफ्नो ट्राभल इन्स्योरेन्सको सर्तहरू पढ्नुपर्छ।
जानकारीमै शक्ति हुन्छ त्यसैले सुसूचित यात्रु बन्नुहोस्, ताकि तपाईंको यात्रा सुरक्षीत, सुनिश्चित र न्यायोचित रहोस्।

– एजेन्सीको सहयोगमा तयार पारिएको ।